Penusah ampuh bah ianya siti penusah ti besai, pengerusak ti nyadi tau ngelui ari semina pengerusak keresa aja. Penemu ti salah ulih nambah ka pengerusak tu; berat amat kitai nemu bagi penemu ti betul tauka penemu ti salah senentang penusah tu. Enggau nya, kami deka nerang ka 13 iti penemu ti salah senentang penusah ampuh bah tu ti suah didinga serta meri ke nuan penemu ti ngena ti ulih meri ke nuan pengelikun, pengerai, serta meransang nuan tegap nempuh penusah ampuh bah tu.
Penemu ti salah lumur 1: Ai ampuh bah nya semina ai ti kamah aja – ia enda tau nganu
Ai ampuh bah suah bercampur enggau ai parit, utai kimia, utai kamah ari jelu, enggau sampah, tu tau ngukun kuman baka E. coli, Salmonella, enggau Shigella. Kuman ti bakatu ulih ngasuh orang kena penyakit kolera, tabin kepialu, serta dysentery (birak cirit berdarah)
Penemu ti salah lumur 2: Ai ti beresi enda ibuh disumai dulu
Maya penusah ampuh bah, ai paip pan ulih kamah laban kuman ti tau nganu serta utai ti kamah, laban ai paip engka udah dalam ai ampuh bah dalam timpoh ti lama. Taja ai paip dipeda ciru sereta beresi, ia tau ngundan kuman ti tau ngerusak ti enda dipeda mata.
Enti ulih, kena ai dalam botol di bisi dijual lalu bedau tekena ke ai ampuh bah, ai tu tau diirup, kena bebasu, kena nyumai, tauka kena beberus ngeli.
Enti enda, panduk dulu ai awak ka munuh kuman ba dalam ia. Ai ti dipanduk nya enda tau enda engkurak dulu dalam timpoh seminit sebedau diasuh celap.
Enti enda ulih nyumai ai, tau nguji pil kena meresi ai tauka ngena penapis ai.
Penemu ti salah lumur 3: Utai pakai ti dipeda agi manah udah ampuh bah nya selamat dipakai
Ai ampuh bah ulih nyelit masuk ke dalam pemakai ti bebungkus taja ia dibungkus. Pemakai dalam tin ti dipeda bisi pengerusak ba tin tauka kembai mega anang dikumbai selamat di pakai.
Buai semua pemakai ti udah bercampur enggau ai ampuh bah. Peresa pemakai dalam tin enggau manah, enti bisi pengerusak, nya mega patut dibuai.
Ampuh bah nya dipeda baka endur ti ulih ngatur pengawa ti ngerindu ke ati ba luar rumah, baka piknik tauka manggang ba tisi ai sungai. Taja pia, anang enda bejaga maya nengah ai ampuh bah tu, laban ia tau mercik ke pemakai kitai, lalu ngerusak ke ia.
Penemu ti salah lumur 4: Bemain ba ai ampuh bah nya selamat, asal ka alun ia enda kuat
Ai ampuh bah nya bisi ngundan sampah ti tenggelam dalam ai, lubang ti enda dipeda, tauka dawai karan. Ia tau mai kuman enggau utai kimia ti ulih mai penyakit enggau tau ngasuh kitai ditangkap karan.
Bejaga, anang besemak enggau ai ampuh bah. Jaga bala nembiak, anang ngasuh sida bemain ba dalam tauka semak enggau ai ampuh bah.
Penemu ti salah lumur 5: Nyamuk utai penusah maya penusah ampuh bah – sida nemu lari lebuh ai surut
Ai ampuh bah ti enda anyut tau endur nyamuk bersarang, tu tau ngasuh orang kena penyakit bala denggi, malaria, enggau chikungunya.
Buai ai ti betakung ari rumah nuan. Ba palan pengenduh, kena ubat nyamuk, kena baju panjai, serta tinduk ba dalam kibung.
Penemu ti salah lumur 6: Nuan enda beguna ka vaksin enti nuan enda bejalai keluar ari menua
Penusah ampuh bah niki ke risiko kena penyakit baka tetanus, hepatitis A, enggau kemik cit (leptospirosis). Vaksin tetanus nya beguna amat enti nuan bisi telih ti bisi tekena ai ampuh bah. Antibiotik baka doxycycline patut diberi ke orang ti bisi risiko tekena kemik cit – sepengudah berandau enggau lutor ti ngemata ke endur nya.
Tentu ka vaksin nuan udah magang. Betemu enggau lutor enti nuan nangi ka nuan udah tekena ai tauka tanah ti kamah.
Penemu ti salah lumur 7: Kulat ba dinding semina nganu orang ti bisi alergik
Kulat ba dinding tumbuh ba endur ti basah, ia tau ngasuh penyakit lempuang, kulit gatal, enggau penyakit ti bukai – utai tu tau nyadi ba orang ti nadai bepenyakit mega.
Beresi ka rumah nuan sepengudah penusah ampuh bah. Asuh dinding serta perengka rangkai dalam timpoh 48 jam enggai ke kulat tumbuh. Kena kipas tauka perengka ngasuh rangkai (dehumidifier) kena ngasuh pejalai angin lancar.
Penemu ti salah lumur 8: Nadai pansut karan, nadai ia nganu!
Taja wayar enda dipeda mansut ka karan, tang ia tau mancar ke karan ba dalam ai ampuh bah tauka utai bukai, tu tau nganu, lalu tau ngasuh bebadi ditangkap karan.
Anang besemak enggau wayar ba dalam ai ampuh bah. Ripot ngagai orang ti megai kuasa enggau lengkas.
Penemu ti salah lumur 9: Palan pengenduh kelalu mayuh orang serta enda likun
Taja palan pengenduh tau penuh ketegal orang ti tasah bah, dia bisi disedia ka utai ti amat beguna baka pemakai, ai ti beresi, serta penyaga pengerai. Pemeresi serta sama besukung betulung tau meri pengelikun ke semua.
Jaga pemeresi endur nuan, buai sampah enggau betul, titih ka atur orang ti megai kuasa ba palan pengelikun. Nyumai, bebasu, serta ngemata ke nembiak ianya cara nuan tau mantu sida ke bukai ti sama tasah.
Penemu ti salah lumur 10: Udah ai ampuh bah surut, nadai ia tau nganu agi.
Ampuh bah ulih ninggal ka utai ti tau nganu baka kulat ba dinding, utai kimia ti kamah, karan ti tau nganu, serta penyakit bukai ti dibai jelu tauka indu utai. Ai ampuh bah tau ngundan ular, kala, nyembayar, empelawa, serta semada ti ngiga endur ngenduh ba rumah tauka ba palan pengenduh.
Enti bisi diketup tauka disengat, meruan jenuh, anang mayuh engkebut, serta bai berubat enggau lengkas.
Jaga pemeresi, jaga pengerai, perati ka tanda-tanda penyakit, bai berubat enti perlu. Begempung enggau perintah serta bala gerempung ukai perintah (NGO) dalam ngatur pemeresi endur serta nagang penyakit nyadi.
Penemu ti salah lumur 11: Enti ai ampuh bah enda nganu, enda iboh pindah ari endur nya.
Ai ampuh bah tau niki enggau jampat, ia tau nganu. Enti enda berumban mindah ke diri ari nya, tau ngasuh risiko lemas, bakal, tauka teputus enggau raban ti meri bantu. Pindah enggau lengkas nitih ke atur orang ti megai perintah. Padam ka semua suis karan enggau gas kena nyumai, kumpul semua perengka ti beguna (tingki tauka surat di beguna, ubat, enggau lampu picit), udahnya padah ke endur pendiau diri ngagai bala kita serumah.
Penemu ti salah lumur 12: Enda ngawa! Aku nemu ngatur pendiau diri!
Ai ampuh bah nya ninggal ka bemacam bekau ngagai kitai semua, lalu pengawa kena mutar ke gaya pendiau kitai ke asal nya pengawa ti berat. Begempung dalam nangkup penusah tu tau ngelempung ke ia, laban kitai sama bebagi serta bekunsi ke utai ti tau dikena ngidup ke nyawa, sida ti balat beguna ke saup tau di saup bebala mayuh, serta risiko utai ti tau nganu ulih dikurang ka.
Meri diri ngena awak tauka penemu kena mantu orang tasah ti bukai. Semua bantu nya beguna bendar, enda ngira ia nya mantu nyumai, mantu meresi ka sampah, tauka semina nyadi pangan ti mending ke sebana orang siku-siku.
Penemu ti salah lumur 13: Penyakit ba runding bekau penusah ampuh bah nya enda suah nyadi lalu ia nemu badu kediri
Penusah ampuh bah tau berat endar ba pengerai runding, ia tau ngasuh tusah ati, lenyau pengadang ati, serta ninggal ka bekau dalam pengerai runding sepengudah penusah (Post-Traumatic Stress Disorder, PTSD). Nembiak ti mit, orang tuai, orang ti ngembuan penyakit serta orang ti beguna ke saup lebih agi ari orang ke selama nya mudah kena penyakit ba runding.
Enti nuan tauka orang di kesayau ke nuan bisi ditinggang penusah, giga bantu ari kaunseling tauka saup ari segi pengerai runding (psikologi). Selalu betanya rita enggau kaban belayan, bala pangan, serta bala raban ti bisi meri bantu. Palan pengenduh suah bisi nyendia ka bantu ari segi sukung pengerai runding; anang nangi minta saup sida.
Kemenudi
Penusah ampuh bah tau nyadi enda disangka-sangka, tang penemu ti betul tau nentu ka pengelikun kitai. Ngena cara mutar ke penemu ti salah serta kerja pengawa tin gena, nuan ulih ngintu pengelikun nuan empu, kita sebilik, serta orang ti besemak enggau nuan. Dalam semua utai, bai nya nyendia ka ai ti beresi, nyendia ka pemakai, ngintu pengerai runding, serta numbohka raban ti mantu orang bukai, besedia enggau bejaga nya beguna amat dalam kitai nyaga pengelikun maya nempuh penusah ampuh bah tu.
This article is a translation of this article https://www.mmgazette.com/flood-season-again-debunking-the-myths-dr-helmy-hazmi/ into the Iban language.